Fianarantsoa, faha 23, 24, 25 Septambra 2006.
Ny tanjona lehibe tiana ho tratrarina dia ny hialan’ny Firenena sy ny Vahoaka malagasy ao anatin’izao fahantrana mangitsokitsoka izao. Anisan’ny tsy maintsy atao ny hanatratrarana eo amin’ny politika ankapoben’ny Fanjakana ny hisongadinan’ny fitomboan’ny harin-karena faobe, isam-paritra sy ny fihatsaran’ny vola miditra isan-tokantrano, na isam-batan’olona mihitsy aza, mba hahafahan’ny olom-pirenena miatrika ireo filàna samihafa, sy mamita ny adidiny eo amin’ny ankohonany, eo amin’ny fiaraha-monina ary eo amin’ny Firenena.

Hahatongavana amin’izany, dia ireto misy fotokevitra ankapobeny tsy maintsy arahina amin’ny fitondrana ny Tany sy ny Fanjakana sy ny sehatra hatao laharam-pahamehana :

Fotokevitra ankapobeny :

• Fampandraisana anjara ny olom-pirenena
• Fanabeazana ho olom-pirenena vanona
• Fametrahana ny rafi-pitondrana mifototra amin’ny fitsinjaram-pahefana tena izy
• Fampiroborobona sy fahalalahan’ny sehatra tsy miankina ary fametrahana rafi-pifaninanana tsy mitongilana eo amin’ny seha-pihariana.
• Ny tsy fiverenana intsony amin’ny fahadisoana efa nisy.

Ireo sehatra lahara-pahamehana :

• Fampandrosoana ny eny ambanivohitra
• Fampianarana sy fanabeazana ary ny fahasalamana
• Fahalalahan’ny finoana
• Famoronana asa mahavelona
• Fiarovana ny tontolo iainana
• Fanomezan-danja ny otrikarena (fizahantany, harena ankibon’ny tany sy andranomasina…)
• Fampitomboana ny foto-drafitrasa
• Fanomezan-danja ny fikarohana

I.1.1- Ny andraikitry ny Mpitondra fanjakana isan’ambaratonga

Tsy maintsy hain’ny Mpitondra Fanjakana ny mampandray anjara ny olom-pirenena tsy ankanavaka, ny fikambanana samihafa, izany hoe ny Herivelona, satria ny olona no harena voalohany sy fitaovam-pamokarana, mba hitondrany ny fahaizany, ny fitiavany ary ny fahavononany, araky ny sehatra misy azy avy, ho fampandrosoana ny Firenena.

Hamoraina ny fomba hahazoan’ny tsirairay mandray anjara. Noho izany dia hialana ny toetran’ny Mpitondra izay lasa mpifaninana amin’ny olona entina ka zary sakana lehibe amin’ny fandraisan’ny tsirairay anjara.

Ialana koa ny fanilikiliana izay tsy mitovy firehana politika amin’ny mpitondra.

Fampandraisa anjara bebe kokoa ny Faritra tsirairay amin’ny alalan’ny fitsinjaram-pahefana tena izy.

I.1.2- Ny adidy aman’andraikitry ny vahoaka Malagasy

I.1.2.1- Vahoaka Malagasy saro-piaro amin’ny zo aman’andraikitry ny isambatan’olona sy ny zo politika

- Arindran’ny lalàna ny fiarovana ny zon’ny tsirairay sy ny fahalalahana fototra :

• . Maneho sy miteny,
• . Fifandraisana,
• . Fanaovangazety suy ny filazana vaovao,
• . Fidirana amin’ny fikambanana,
• . Fivoriana, fivezivezena,
• . Fiheritreretana ho amin’ny finoana dia samy.

Dia samy iantohana ho an’ny rehetra manori-ponenana eto amin’ny tanin’ny repoblika :

• . handao ny asa sy ny fianarana,
• . fiarovana ny safidim-bahoaka amin’ny fifidianana rehetra hatao eto amin’ny firenena

I.1.2.2- Tsy handefarana manana ny rariny amin’ny zo sy adidy momba ny toe-karena, sosialy ary koltoraly :

• - ao miantoka ny maha izy azy ny tsirairay sy ny famendrehana ny fivelarana feno ara-batana sy ara-tsaina ary ara-pitondra-tena tsy ho voatohintohina,
• - ny fahasalamana dia ny hatrany ambohoka
• - fiarovana ny hasina maha olona ny ankohonana fototra sy voajanahary sy andrin’ny fiaraha-monina manome hasina ny aina
• - fivoaran’ny tsirairay ara-tsaina, ara-batana hianatra an-tsekoly sy fianarana arak’asa,
• - fandriam-pahalemana miantoka ny fiaraha-monina sy ny fihariana ary ny lafiny lovan-tsaim-pirenena ary ny fisokafana any ivelany.

I.1.2.3- Vahoaka Malagasy manam-po hanara-maso ny olomboafidiny sy ny mpitondra isan’ambaratonga amin’ny : . Fampiharana sy fanajana ny lalana velona sy manankery . Fanaovana lalàna manamora ny fihariana sy ny fiveloman’ny mponina . Fampiasana ny volam-panjakana hisondrotana sy handrosoan’ny Malagasy.

• - Fametrahana ho zava-dehibe ny fitaizana ho olom-pirenena vanona.
• - Fiarovana ny zavatra efa misy (ny soa iombonana)
• - Fahasarotam-piaro amin’ny maha-izy antsika. Malagasy nefa koa tsy maintsy hananana ary fehezina ny mampandroso ny hafa (firenen-kafa)
• - Fambolena ny toe-tsaina “milofo vao manan-javatra”.
• - Fiezahana hamokatra zavatra tsara (kalitao)
• - Fanomezan-danja ny hasin’ny olombelona, ny hasin’ny Raiamandreny sy ny zokiolona.
• - Fahatahorana an’Andriamanitra Andriananahary (aza ny lohasaha mangina no jerena fa Andriamanitra an-tamponin’ny loha).
• - Fampahafantarana ny zo sy ny andraikitry ny olom-pirenena.
• - Fanomezan-danja ny Hasin’ny Firenena.
• - Fametrahana amin’ny toerany ny soatoavin’ny Malagasy.
• - Ny maha zava-dehibe ny firaisam-pirenena (Unité Nationale).
• -Fifampitaizana ho saro-piaro amin’ny safidin’ny vahoaka malagasy mpifidy eo amin’ny fifidianana atao eto amin’ny firenena
• - fahaizana mifanaja sy manaiky ny mahampiara-monina antsika toa ny grika, ny sinoa, ny karana ho tompon-tanindrazana malagasy.

• - Tsy maintsy atao farany izay haingana ny fitsinjaram-pahefana tena izy. Fampitomboana ny fahefana sy ny loharanom-bola eo amin’ny vondrom-bahoaka na eo amin’ny sampan-draharaham-panjakana (services déconcentrés).
• - Fametrahana ambaratongam-pahefana hanara-maso sy hitsara an’ireo mpitondra Fanjakana ambony (Haute Cour de Justice sy Inspection Générale de l’Etat) tsy amin’ny endriny misy azy ankehitriny anefa fa amin’ny endriny vaovao. Tsy maintsy apetraka haingana io satria tsy ho tanteraka mihitsy ny fampiharana an’ireo fotokevi-dehibe izay manana anjara toerana lehibe eo amin’ny fampandrosoana ny Firenena toy ny Demokrasia (ny fagnina, ny teny ierana, adihevitra, fifidianana malalaka, fanajana ny safidim-bahoaka, sns...). Toy izany koa ny mangarahara, ny Fanjakana tan-dalàna, ny Fanjakana tsara tantana, raha tsy tsapan’ny vahoaka entina sy ny Mpitondra aty ifotony mpandray baiko sy mpampihatra ny lalàna, fa misy famaizana hatao amin’ny Mpitondra ambony nanao fahadisoana.
• - Fidin’ny vahoaka mivantana ireo Mpitondra, hatrany amin’ny Filohampirenena, mipaka amin’ny Fokontany. Toy izany koa ny Fahefana mpanao lalàna sy ny Filan-kevitra isan’ambaratongan’ny Vondrom- bahoaka itsinjaram-pahefana (Région, Commune).
• - Tsy misy fifidianana azo atao amin’ny fotoam-pahavaratra fa amin’ny main-tany (15 avrily hatramin’ny 15 novambra) no azo anaovana fifidianana.
• - Tsara kokoa raha atao alohan’ny fifidianana Filohan’ny Repoblika ny fifidianana Solombavambahoaka.
• - Fisarahana sy fifandajan’ny fahefana tanteraka (séparation et équilibre stricts de pouvoir).

Mahatsapa ny Tambatra fa manana anjara toerana lehibe miantoka ny fanitsiana eo amin’ny fiharihan-karena sy fampandrosoana ity firenena iaraha-manana ity ny sehatra tsy miankina : ireo mpandraharaha vahiny sy ireo tera-tany Malagasy. Marihana fa raisina sy ekena ho isan’ny mpandraharaha tera-tany Malagasy tsy miankina ireo Grika, Sinoa ary Karana, indrindra ireo efa zanatany.

• - Hiezahana ny tsy hiverenana intsony amin’ireo fahadisoana efa nisy teo amin’ny fitantanan-draharaham-panjakana (ny ara toe-karena, ny ara – sosialy, ny ara-politika ary ny ara-koltoraly). Ohatra : fifandimbiasam-pahefana.
• - Fanitsina ireo lalàna efa lany andro hifanaraka amin’ny zava-misy (Lalàm-pifidianana…). Lalana ho an’ny rehetra fa tsy natao hanamafisan’ny Mpitondra ny toerany.
• - Fanomezan-danja ny teny ierana, ny adihevitra miaraka amin’ireo manam-pahaizana manokana alohan’ny handraisana fanapahan-kevitra amin’ny zava-dehibe iankinan’ny aim-pirenena. Ohatra : détaxation, fanalavana ho 07 taona ny dingana voalohany amin’ny fampianarana.

Ho jerena manokana :

• - Ny fandriampahalemana sy ny filaminam-bahoaka (ady amin’ny asan-dahalo).
• - Ny fananan-tany ka apetraka haingana ny lalàna manamora ny fomba fizakan-tany ka omen-danja bebe kokoa ao anatin’izany ny fiaraha-monina eny an-toerana, ny fanapariahana sy fampitaovana ny sampan-draharahan’ny Fananan-tany sy ny fandrefesan-tany.
• - Famerenana ny operation “tohodrano”.
• - Fanafainganana ny fampidirana herin’aratra eny ambanivohitra.
• - Politika vaovao momba ny voly fanondrana ka hatao vain-dohan-draharaha sy handaniana fotoana ny fifampidinihana momba ny hoavin’ny voly fanondrana any amin’ireo faritra mpamboly azy ireo (ohatra : fampitaovana ny mpamboly, fitadiavana lalam-barotra, fanatsarana ny kalitao, fikarohana voly fanondrana vaovao, sns...).
• - Hojerena ihany koa ny fanavahana ireo faritra natokana hatao fiompiana sy ny faritra atokana ho an’ny fambolena.
• - Fampidirana ny “Mécanisation” eo amin’ny fomba famokarana eny ambanivohitra ka ireo efa mitrandraka ny tany no hozarina amin’ny « mécanisation » ary koa ireo tanora tsy an’asa midina eny ambanivohitra hanabevoho ny tany. Ny politikan’ny TAMBATRA dia tsy ny hampidirana mpanam-bola ho mpanarama ny tantsaha fa ny tantsaha mihitsy no ho zarina hampihatra ny “mécanisation”.
• - Fametrahana “parcs d’outillages agricoles” hampanofaina ny tantsaha hanazarana azy ireo hahay hampiasa sy hividy fitaovam-pamokarana moderina.
• - Fametrahana parc d’engins de travaux publics, fara-faharatsiny eo amin’ny faritra, fa ny tanjona dia eo amin’ny Distrika.
• - Fiarovana ny biby fiompy gasy eo anatrehan’ny fanafarana biby fiompy avy any ivelany (ohatra : omby vavy be ronono).

II.2.1- Ny fampianarana sy ny fanabeazana

• - Fanavaozana tanteraka ny rafi-panabeazana ka fanabeazana mifototra amin’ny fiveloman’ny olona sy mifanaraka kokoa amin’ny zava-misy no apetraka, izany dia tsy maintsy miainga amin’ny fihaonam-bem-pirenena sy fakana ny hevitr’ireo manam-pahaizana samihafa.
• - Famerenana ny hasin’ny Mpanabe izay tsy maintsy hojerena manokana eo amin’ny mpiasam-panjakana hafa.
• - Fampianarana mifantoka amin’ny maha-izy antsika, mifantoka amin’ny soa toavina, amin’ny fomba amam-panao, amin’ny teny sy ny tantaram-pirenena.
• - Fananganana Foibe Fikarohana ara-pedagojia sy momba ny rafitra ho fanatsarana ny votoatim-pampianarana.
• - Omen-danja lehibe ny fikarohana (recherches) amin’ny alàlan’ny famatsiana ara-bola sy ara-pitaovana.
• - Fijerevan’ny Fanjakana manokana an’ireo zaza hita fa misongadina eo amin’ny fianarana.
• - Hohenjanina sy haraha-maso ny fibosesehan’ny kolontsaina vahiny izay tsy mifanaraka amin’ny soa toavina Malagasy.
• - Ezahana ny hahafeno ireo sampam-pianarana (filières) isan-tsokajiny eny amin’ny Oniversite isaky ny renivohi-paritany teo aloha (6).
• - Hisy fepetra horaisina mikasika ireo toera-ponenan’ny mpianatra ao Frantsa (Arago sy Cachan - Frantsa) mba handravana ny fitongilalana sy ny fiangarana amin’ireo samy mpianatra Malagasy amin’io firenena io. Mpianatra 135 ihany no zakan’ireo toeram-ponenana roa ireo amin’ireo mpianatra aman’alina. Vola be no lanin’ny fienena Malagasy hiantohana ireo toeram-ponenana ireo ary tsy zakantsika ny fikojakojana azy efa ho taona maro. Azo heverina ny hamadihana ireo toeram-ponenana roa ireo, ho tantanan’ny tsy miankina hampidi-bola ho an’ny firenena Malagasy, ka ny vola azo amin’izany dia entina manatsara sy manitatra na toera-pianarana vaovao, na toera-ponenana vaovao ho an’ny Mpianatra amin’ny ambaratonga ambony eto Madagasikara. Ilaina ny maka manampahaizana manokana hanao ny fanadihadiana mialoha ny fanampahan-kevitra.
• - Ezahana ny hananganana oniversite isam-paritra miandalana araka izay zakan’ny firenena sy ny fahombiazantsika ary ny fifampidinihana amin’ireo mpampiasa vola iraisam-pirenena sy ny tsy miankina.

Fehiny : Na inona na inona dingana ijanonany, ny olona avy nandia fianarana dia sady hahay taratasy no hahay hanangan-javatra hivelomany.

II.2.1- Ny fahasalamana

Tsy eken’ny saina mihitsy amin’izao taon-jato faha 21 izao no mahita sy maheno ny feon’ny Malagasy maro amin’ny tsy fazahoana mitsabo tena noho ny fahefa-mividy tsy mitsaha-mitotongana. Manamarika ny fikambanana Tambatra sy ny kandidà fa azo tanterahana ny manatsara ny fitsaboana eto amin’ny firenena rehefa tafapetraka ny mangarahara sy ny fanjakana tsara tantana amin’ny endrika vaovao indrindra ny tsy maintsy hampijoroana ny haute cours de justice. Tompon’andraikitra mahafehy tanàna tsy hitsabaka anaty tairim-bolam-panjakana natokana ny sehatra mahakasika ny fitsaboana no ilaintsika antoka handresena nyu gaboraraka mampahory any vahoaka mila fitsaboana ny fitantanana marina sy madio. Koa ireto no ho laharam-pahamehana amin’izany :

• - Fanohizana ireo praograma efa vita mba haharitra
• - Fampitomboana sy fanampariahana ny fotodrafitrasa ara-pahasalamana sy ny fanaovam-bakisiny
• - Fampitoviana ny fahafahan’ny tsirairay mitsabo tena sy hampiasa ny fitaovam-pahasalamana.
• - Fanatsarana ny kalitaon’ny fitsaboana
• - Fanapariahana ny fomba fitsaboana
• - Fampiroboroboana ny fiarahamiombon’antoka mahakasika ny fahasalamana
• - Fanamafisana ny fahaiza-manaon’ireo rafitra isan’ambaratonga mahakasika ny fahasalamana.
• - Fisiana famatsiam-bola mahomby sy mitovy mifototra amin’ny fampitovianjo ny tsirairay
• - Ny fitsaboana nentim-paharazana dia hotohanana amin’ny alalan’ny fikarohana mba ho ara-tsiantifika sy hanara-penitra.

Sarobidy amin’ny Malagasy tsirairay ny finoana. Arovan’ny lalampanorenan’ny firenena Malagasy ny finoana maharesy lahatra ny tsirairay. Mampisavoritaka, miteraka adilahy eo amin’ny sehatry ny finoana maro ny fitsabatsabahan’ny mpitondra fanjakana ambony sy ny fiandaniana amin’ny finoana iray. Averina arindra araka ny lalam-panorenana mahafanjakana laika ny repoblika Malagasy ny fifampitondrana sy ny fifandraisan’ny fanjakana sy ireo tompon’andraikitra maro mitaiza sy manentana ny vahoaka Malagasy amin’ny alalan’ny finoana. Teny miera sy fifampidinihana hatrany aryy ezahana tsy hiangatra ary tsy hanilika ny sasany no handrindrana ny mpitondra fanjakana sy ireo raiamandreny mpitarika karazam-pinoana eto amin’ny firenena.



II.4.1- Famoronana asa mahavelona ho an’ny tanora

• - Fametrahan’ny fitondrampanjakana rafitra hampiroborobo ny fisian’ny asa mahavelona, indroindra ho an’ny tanora sy ny vehivavy.
• - Anjaran’ny Fanjakana ny mitady fomba hanofanana ny tanora hahay hanangan-javatra hiteraka asa fivelomana (reinsertion sociale).
• - Hatao vain-dohan-draharaha ny fanamorana ny fomba ahazoana mindram-bola madinika (micro-crédit) ka hisy anto-bola avy amin’ny Fanjakana momba izany.
• - Havaozina tanteraka sy faran’izay haingana miaraka amin’ny mpanam-bola sy ny mpandraharaha ara-toe-karena ny Lalàna momba ny fandraharahana (Code des investissements) sy ny Lalàna momba ny fifaninanana (Loi sur les concurrences).
• - Hojerevana akaiky ireo vahiny ela nonenana teto mba hanana zom-pirenena hananany zo amin’ny fizakan-tany.
• - Hapetraka ihany koa ny rafitra manamora ny fanoratana ny tany, satria ny tany no harena eo am-pelatanan’ny olona hahafahany manao antoka ahazoana misambo-bola hanaovana fandraharahana.
• - Haparitaka ary homena fitaovana ampy ny sampan-draharahan’ny fanananan-tany sy ny fandrefesan-tany ary izany dia hatao ao anatin’ny fotoana fohy.

II.4.2- Asam-panjakana ankapobeny.

• - Eazahana ny olona raisina ho mpiasam-panjakana, mba ho olona manana faharesen-dahatra amin’ny sahan’asa iray fa tsy hatao filan-tsy mahita sanatria ny asam-panjakana na hatao fitadiavam-bola fotsiny ihany. Hisy fisedrana manokana mialoha momba izany faharesen-dahatra izany na tsia.
• - Famerenana ny hasin’ny mpiasam-panjakana. Karama mahavelona, manome risi-po mba hanome hasina ny maha-olom-belona.
• - Atao zava-pady ny fampidirana politika amin’ny raharaham-panjakana, satria manimba ny risi-pon’ireo efa manana faharesen-dahatra (conviction).
• - Ho hamoraina arak’izay azo atao ny antontan-taratasy ilaina izay hita ho mavesatra loatra ho an’ny olona ny fikarakarana azy ireny.(simplifaction des procedures).

• - Fiarovana ny ala efa misy. Tsy ampy ny manasazy ny mpanimba ala fa adidin’ny Fanjakana ihany koa ny mitady foto-pivelomana hafa ho an’ny olona mba hialany amin’ny fanimbana ala.
• - Fambolen-kazo. Hapetraka ny Lalàna momba ny fambolen-kazo ka hodidina ny olom-pirenena mihoatra ny 18 taona hamboly hazo. Hisy noho izany karatra fambolen-kazo sy sampan-draharaha hanara-maso. Hosoratana amin’ny tompon-kazo ny tany voavoliny.
• - Fiarovana sy fikojakojana ireo biby sy zava-maniry tsy fahita firy eto amintsika.
• - Fampidirana rano fisotro madio.

II.6.1- Ny fizahan-tany

• - Ho fantarina ireo toerana manan-tantara ka ho trandrahana hisintonana mpizaha tany mielim-patrana manerana ny Nosy (sites touristiques).
• - Hamoraina ny fahafahan’ny olona manangana foto-drafitr’asa misahana fizahan-tany.
• - Hataon’ny Fanjakana ho zava-dehibe ny fanaovana fihaonana ara-koltoraly hitrandrahana ny zava-kanto isa-paritra (festivitiés culturelles régionales)
• - Hovitaina amin’izay ny lalam-ben’ny Firaisam-pirenena manodidina an’i Madagasikara.

II.6.2- Harena an-kibon’ny tany sy an-dranomasina

• Loharanon-karena mampitombo haingana ny tahirim-bolam-panjakana ny harena an-kibon’ny tany sy an-dranomasina.
• - Hodinihana eo anivon’ny fihaonam-bem-pirenena ny fitsipika hametrahana mazava ny tombontsoan’ny Faritra sy ny vola tokony hiditra anaty kitapom-bolam-panjakana.
• - Atao izay hahitan’ny mponina eo amin’ny faritra itrandrahany harena an-kibon’ny tany (sekoly, hopitaly, làlana na tohodrano).
• - Tsy maintsy hajaina ny tany avy notrandrahina alohan’ny handaozana azy tanteraka.
• - Fanomezana zo ny olona eo amin’ny faritra hitrandraka ny harena an-kibon’ny tany mipoitra eo amin’ny faritra misy azy.
• - faritana mazava tsara ny faritra natokana ho an’ny mpanjono madinika sy ny mpanjono mpampiasa fitaovana harifomba. Arovan’ny fanjakana araka izany ny mpanjono madinika ao amin’ireo faritra natokana ho azy ireo. Faritana isa-taona ny tahiry hazan-dranomasina fanondrana any ivelany (makamba, hazan-dranomasina isankarazany ary ny trondro azo jonoina)

Fampitomboana ny fotodrafitr’asa na an-tanan-dehibe na ambanivohitra Ohatra :

• - làlana sy tetezana
• - fampidirana rano fisotra madio
• - sekoly sy toera-pitsaboana
• - foto-drafitr’asa hampiroboroboana ny fiompiana sy ny fambolena
• - tohadrano vaventy azahoana jiro sy herinaratra hiteraka orin’asa vaovao
• - fampitaovana moderina momba ny fifandraisana sy ny serasera
• - foto-drafitr’asa mahakasika ny fitaizana ny tanora sy ny fanatanjahan-tena

Homena lanja sy hotohanana amin’ny teti-bola matanjaka sy fampitaovana ny fikarohana. Hiantohana ny mpikaroka eny amin’ny ambaratonga ambony ary hamporisihana ny fisokafana sy ny fivelarana ho eo amin’ny seham-pihariana maro hiteraka fivoarana sy fandrosoana azo tsapaintanana. Hentanina sy hanaovana antso avo ireo notahian-janahary manam-pahaizana amam-pahalalana ary ireo mpandraharaha amin’ny sehatra tsy miankina hifanome tanana mba azahoantsika mamadika ny vokatry ny fikarohana hiteraka fihariana mampidi-bola eto an-toerana sy ny any ivelany indrindra ho famoronan’asa ho an’ireo zandry zanantsika tonga taona sy ny tsy an’asa ary very asa.

Ireo voalaza eo ambony ireo ny fotokevitra lehibe sy ny laharam-pahamehana ary ny teti-pihariana noheverin’ny fikambanana Tambatra ho enti-manarina an’i Madagasikara ao anatin’izao fahantrana izao.

Hiaraha-midinika manokana amin’ireo mpandraharaha vahiny sy tera-tany ary ny mpamatsy vola voakasik’izany ireto sehatra manaraka ireto :

• - Fotodrafitr’asa
• - Harena an-kibon’ny tany sy an-dranomasina
• - Fizahan-tany
• - Volam-panjakana sy ny hetra
• - Varotra, indostria, asa-tanana ary fampivelarana ny sehatra tsy miankina
• - Paositra,
• - Kolotsaina sy ny filazam-baovao (code de la communication)
• - Ny fampiasam-bola (code des investissements, loi sur la concurrence)

Tompokovavy sy tompokolahy, ireo no vokatry ny fiarahamidiniky ny Mpikambana Tambatra tonga nandray anjara tamin’ny kongresy nasionaly notontosaina teto Fianarantsoa nandritra ny telo andro. Miisa 3500 mianadahy mianaka izy ireo avy amin’ny faritra 22 sy distrika 98 avy eto amin’ny firenena Malagasy. Nandray anjara koa ny solotenan’ny Tambatra avy any dilam-bato (Eropa). Koa antsoina ampitiavana sy ampanajana ny vato nasondrotry ny tany, ny manam-pahaizana, ny mpandraharaha sy sokajin’olona maro anabavy sy rahalahy ary ny vahoaka mpifidy resy lahatra amin’ny tokony hanitsiana ny tsy fahombiazana, mampahantra ny firenena ka tokony hatrehantsika mianakavy. Tsy mihidy varavarana sanatria ny fikambanana Tambatra ka raisina an-tanandroa ny tolo-kevitra hanatevina ity drafitr’asa na praograman’asa atolotra anareo ity. Misaotra Tompokovavy, mankasitraka Tompokolahy. Ny Kongresy Nasionalin’ny Tambatra Ny Birao Nasionaly

Fianarantsoa, faha 23, 24, 25 Septambra 2006.
Ny Filoha Nasionaly
Pety RAKOTONIAINA
A. MIALOHAN’NY FIFIDIANANA

Mialohan’ny fifidianana dia handray andraikitra ny Fikambanana Tambatra sy ny Kandidà-ny hiantso ireo Kandidà hafa rehetra : ny Raiamandreny ara-panahy sy ara-drazana sy ny herivelona samihafa misy eto amin’ny Firenena hifampidinika ambony latabatra, hamolavola fivoriambe, handraisana fanapahan-kevitra amin’ny fanomanana sy fiatrehana ny fifidianana mba hahatongavana amin’ny fifidianana milamina

B. MOMBA NY FIFIDIANANA

Zava-dehibe ny hampiasana vatom-pifidianana tokana ho an’ny mpifaninana rehetra ary ny fisian’ny komity mahaleo tena hanara-maso ny fifidianana mba hisorohana ny hala-bato sy hampilamina ny fifidianana.

D. ANTSO ATAO AMIN’NY FOLOALINDAHY

Zava-doza amin’ny ho avin’ny Firaisankinan’ny Foloalindahy ny fiverenan’ny ady vokatry ny fifidianana tsy milamina sahala amin’ny taona 2002. Koa aleo misoroka ny tsy hisian’izany satria faharavan’ny Firenentsika izany. Koa miangavy anareo hanohana ny hevitra rehetra hahatongavana amin’ny fifidianana milamina.